NKETTA MU BIZINGA BYE YUGOYUGO
** Mukyalimu ensobi nnyingi ze sinnaba okugolola naddala empandiika entongole**12:25:56 PM, 2016-06-21
Mikwano gyange bwoya gitera okumbuuza engeri amaaso gange agaali ag'empujjo gye gaateereeramu are ne bwe nakutuka ekiwalaata eky'embagirawo ekitaali mu lulyo ate n'ennyindo n'ensongola. Okubannyonnyola bino nga bwe byajja nali nteekwa okubawayiza ebyantuukako mu sematalo on owa jjo lya balamu bye nali nnyimye amazzi. Naye no bwe nabinyumizaako kagafumba ne nfabulago, bo kwe kuntayirira mbinyumizeeko n'abalala era baludde ddaaki ne bankuulamu omwasi.
Be twasomanga nabo bammanyi nga Kakundugulu, erinnya lye bampaatiikako ne lisimba emmizi, ate bo bwe twazirwanako bammanyi nga Kasiribiti. Eby'e Kololo nga Sargent ŋŋoŋo simusudde, Tororo, Giligiri, Mbagasi ne Gonda ebyo byo mbirekedde bannange abalala babirombojjeko naye ebyange nja kubitandikira mu nsi z’Abawalabu.
Nga tumaze okukekeza ennyago mu nsi nnyingi, twatuuka mu nsi z’Abawarabu gye nnyingirira mu kitongole ekikessi. Bwe twamala okutendekebwa, okubangulwa era nokukenkusibwa mu katoola w’ebintu ne tubuuzibwa ebigezo ebyalumya buli omu ogwengulu. Bwe kityo nga abamu tumaze okubikuba oluku mu mutwe nabalala nga bibatudde ku nfeete, Sargent Kwi Tamutaamu omuyugoyugo era eyali omugabe waffe Kopolo Monyo Odeku, Figo Mukombankuyege Kataayi, Palalemo Byomera, Ludyeku era nange kamwakoogera, twalondebwa mu gubinja gwa bantu nga kinaana tugende tukette mu bizinga...
